من ميدان عاصفة الحزم .. بطل عنزه

من ميدان عاصفة الحزم ..
ميدان الشرف والبطوله على الحد الجنوبي . للذود عن الدين والوطن والمليك ..

طُلب من وكيل الرقيب/ محمد بن لافي بن سالم الضوي الجعفري العنزي

كتيبة الإمداد والتموين/٢ ..
ان يقوم بمهمه صعبه لايستطيع القيام بها إلا من يتسم بالشجاعه والتفاني وقوة العزيمه ..

وهو إخلاء مدرعه بعتادها على الخط الأمامي قبل وصول العدو إليها .. اثناء تراجع القوات وتقدم العدو .... وهذا من فنون وتكتيك الحرب تقدم وإنسحاب ..


وقام بذلك دون أيّ تردد أو تأنّي أو تراخي ..

ثم تلقى خطاب شكر من قائد كتيبته..العميد/ محمد بن عامر العجمي


وبدورنا نحن نشكر الإبن محمد على هذا العمل البطولي والمشرّف

ونعتبره فخر ونوماس لنا جميعاً …


ــــــــــــــ



البطولـه .. يا محقّقْـت .. البطولـه
ماهي بـ تشجيع كوره فـ النوادي
البطوله .. في مياديـن .. الرجوله
والشرف .. بالذّود عن حد البلادي
كل .. واحد .. له هواه .. وله ميوله
ومن يساوي بين ذاك .. وذاك غادي
فيـه كـاسٍ .. يشترى .. كلٍ .. ينولـه
وكاس .. غالي قيمته .. دم الفُوادي
نالــه ( محمد ) عسى الله .. لايزوله
إبـن أخوي وتاج راسي والسنادي
يوم . نادوه .. زمـلاه .. وصوتولـه
قال تبشـر بالسعد .. ويـن المنادي
قيل .. تكفى .. مدرعتنا والحموله
هاتهــا .. قـدّام .. يغنمهـا المعادي
وإنطلق ماهاب . والخطوه عجوله
ما ثنا رجليه .. رجفـه .. وإرتعادي
وإستحبها .. من مكان الموت حوله
بساعةٍ .. يوحابها .. قدح الزنادي
صفقولـه 👏صفقولـه 👏صفقولـه
يستحق .. يباس خشمه والايادي
هكـذا بـ يكون .. تحقيق البطوله
ماهي بـ تشجيع كوره فـ النوادي


حمد الضوي الجعفري
👆👆👆👆

خطاب الشكر


ياحمد كلا يقول اللي تقوله
وفعل ابن لافي ترى ماهو بعادي
أقدم المقدام والطنخة ذلوله
حامل روحه على كفه مفادي
يالعذارى مثل هذا اطمحوله
جعل يفداه الردي يوم الجهادي
الرصاص يمر من جنبه وحوله
الكفن في يد وإيدن عالزنادي
لين إ راد الله ناموس ينوله
بلغوه الشكر قهار الاعادي
ابن حفول شاش وانزاحت حموله
يوم شرواه الضوي دون البلادي
عايش في الغرب ويخيل خيوله
كل برق المحه يمزع فوادي
الله ينصر دولتي أعز دوله
وينصرال سعود حكام الرشادي
والمعذره على قلهاوهويستاهل اكثر
"
أخوكم عبدالله ابن حفول اليامي

👇👇👇 👇👇👇 👇👇👇
يستحق الاشاده صاحب البطوله والفعل المشرف على الحد الجنوبي بعاصفة سلمان الحزم عندما تراجعت كتيبته هووزملائه أثناء الكر والفر في مواجهة العدو بقيت مدرعه بكامل اعتادها ونخوه زملائه وعاد لهاواحضرها من تحت النار.

هو البطل. محمدابن لافي ابن سالم الضوي الجعفري العنزي.
بيرق الشرف لكل بني وايل وعلى وجه الخصوص قبيلة الجعافره وهذه المشاركه اعتزازِِ بشبل الضواويه

من الشاعر.
لافي بشيرالضوي الجعفري العنزي
👇👇👇
عاش بطلِِ موقفه شرف حموله.
يا سلايل لابةِِ ترو الحدادي
عز ساس وعز باس ومن زحوله.
فزعةالبل في ضحى يوم الطرادي
والمعارك شرها يا ضفى شموله.
المعاند يلطمه كف العنادي
يا منومس من نخوه وناظروله
لا عدمتك راس ماحده حوادي.
حي راس ماحوى غير الرجوله.
ويرحم اثنين غذوه من المهادي.
الرجا به من نهار تممو له.
بيرقاِِ للطيب وحسام الهجادي.
وحقق الامال في صطوت فعوله.
يا محمد يافخر شيل الجنادي
والمنايا تطحن صوله وجوله.
ولا قصر عمرالشجاع ولايزادي.
ابن لافي كل ربعه رددو له.
جعفرياِِ مايجي وجهه سوادي.
ساس قوماِِ مارضو موقف سهوله.
فوق عجلات النضى والا الجيادي.
من جهلنا ياجد النفس الجهوله.
وبيعة الارواح في سوق المزادي.
والأسود احفادهم تبقى شبوله.
في رجاالله واتكالي واعتمادي.

ابو حاتم لافي البختان

مجاراه للشاعر وابن العم حمد الضوي والشاعر وابن العم سعود الراجي
افتخارا" بالموقف البطولي الذي سجله أخونا محمد بن لافي سالم الضوي


البطوله .. يامحققت .. البطوله
وقفت المسطور قدام المعادي


يضرب محمد مثل كيف الرجوله
بالثبات.. وبالصباح..وبالهجادي


ياابن لافي بك فخرنا من يطوله
ياحزامي.. ياسلاحي.. يازنادي


صامل الوقفات فعله قبل قوله
لاغرابه! عقب خطلان الأيادي


من رجالن ضدهم ماحسبوله
كعمت العايل عليهم شي عادي


ويوم ابن عامر نخاك بحد دوله
يدري العجمي عليك الأعتمادي


والمعارك طاحنه صوله وجوله
ميزالساطي كذا الشخص القيادي


عاش راسك يالعريب ابن الحموله
وأشكر اللي شاش لفعولك واشادي


وكل شخص بوايل العربى يقوله
ياحزامي.. ياسلاحي.. يازنادي

الحميدي مونس ابن منوه

مجارات للقصيده. الشاعر حمد


يامحمد لو نقول اللي نقوله
موقفك موقف بطل ماهو بعادي


والقصايد لو كتبناها خجوله
تنثني من دون شخصه بعتقادي



يوم حصل الموقف اللي به بطوله
يابياض الوجه ولا به سوادي

قال عندي واحتزم يشعب ذلوله
ميتن قلبه على موته مفادي



اجتمع فيه الشجاعه والرجوله
والعزاوي واشهب الدخان بادي


اشهد انك وافين وابن حموله
اكفخ الجنحان ياطير الهدادي


والوطن له حق في عرضه وطوله
كلنا دونه على دحر المعادي


كلنا دون الوطن والدين دوله
لو تروح رواحنا دون البلادي



مادخل في صفنا روس مغسوله
كلنا سلمان ياندا المنادي


ندحر العدوان واللي صفقوله
الله اكبر ياذعاذيع البرادي




سعود الضوي

الله يبيض وجه محمد بن لافي بن سالم الضوي على الموقف البطولي

وصح لسان شعرائنا الكرام

لاهنت اخوي عبدالرحمن على النقل


تقديري

الله يعافيك على الطرح الراقي ,,
كل الشكر لك
تحياتي

يسعد أيامك
سلمت الأنامل على الطرح الجميل
حفظك المولى وأدامك

يعطيك العافية على الطرح القيم والجميل
وًٍدًٍيًٍ......لًًًٍٍٍكًًًٍ......

اخي الكريم
يعطيك العافيه وتسلم الايادي
طرح رائع وانتقاء اروع لاهنت
ننتظر مزيداً من جديدك المميز
دمت بحفظ الله
$أميرة الورد كانت هنا $

صح لسان شاعرنا الرائع لافي بشير الجعفري

لاهنت اخوي عبدالرحمن على النقل


تقديري

تسلم اياديك على جمال الطرح
عافاك الله

ودي لك