قصيدة الشاعر : ملعب العواجي . في رحيل ضنا عبيد من نجد الى الشمال

رحيل (ضنا عبيد) من نجد .. وتوجّد ملعب العواجي !!


ارتحل القسم الاعظم من قبائل ضنا عبيد بقيادة زعيمهم ابن غبين !!
حيث إن عمر هذه الزعامة لا يقل عن 600 سنة قد مضت ، وابن غبين شيخ ضنا عبيد في زمنه !!
فنزلوا في مناطق الجوف وكان قد حفر الفدعان عد صوير المعروف بمنطقة الجوف ثم وصلوا إلى مناطق في أواسط سوريا في عام 1230هـ وكان له أخبار كثيرة في بداية وصولهم ، من الحروب والنزاعات مع سكان البلاد القدامى ،
سجّل البعض من أخبارهم الكتاب العرب والمستشرقين وعن رحيلهم
قال الشاعر ملعب بن محمد بن شعيل العواجي
هذه القصيدة يذكر رحيلهم ويتوجد عليهم وذلك أن قبيلة ولد سليمان والسبعة والفدعان من ضنا عبيد قد ارتحلوا جميعا في بداية الامر ثم عاد البعض منهم الى ديارهم لوجود أملاك قديمة في خيبر فقال ملعب العواجي يتوجد على قومه ضنا عبيد ويذكر رحيلهم :



قـال العواجـي والعواجـي ملعـب
لو تدري العـراف مـا يستشيرهـا
فكـرت باللـي فـرق أولاد وايــل
أبكي ودمع العيـن حـرق نظيرهـا
شوفي بعيني يـوم أقفـت ظعونهـم
يقودهـم شيـخ الجهامـة كبيرهـا
بتنـا نديـر الـراي وجْـلا قلوبنـا
وندير من صعبات الأريـا عسيرهـا
بتنا ندير الراي من شـور شيخنـا
كبيـر قومـه والمحايـل يديـرهـا
قال أرحلوا ما عاد في نجـد مقعـد
نسيـر والصعبـات ناطـا خطيرهـا
تحلحت من ضلع المسمـى ظعايـن
يا ما تفرق عـن وريـك نشيرهـا
جينـا بـوادي الديعجـان ونزلـنـا
وكم خفرة يصـد عنهـا عشيرهـا
طلعنا مـع ريعـان حايـل وموقـق
وخشوم سلمى فض عنهـا مجيرهـا
وردنا على العظيمات عدّ ما هو روي
شرب قليل القـوم وظمـي كثيرهـا
وصله علينا ولـد الكثيـري غـارة
الغارة القشرا علـى مـن يغيرهـا
توحي نغيط الطيـح بطـراف قومـه
لج القطـا لا نـش عنهـا غديرهـا
ضربنا على الدهنـاء عـروق تثنـا
وكم بنت شيخ خففت عـن بعيرهـا
حلنا وتسرسحنا من السير والسرى
وزمولنا مـا عـاد تسمـع هديرهـا
قطع بنا [ابن غبين] عشرين سمـرا
وفي دومة الجندل حفرنـا صويرهـا
وبصوير قيّضنـا وصرنـا نزايلـه
واقفت ظعون الربع وابعد مسيرهـا
وعدنا مـن الجوبـه لنجـد العذيـه
دارٍ ولفنـا وردهـا مـع صديرهـا
وأقفت على الشنبل جهامة ربوعنـا
يقودهـا ولـد الغبينـي أميـرهـا
راموا لهم ديره بها الريف والرخـا
ديد العسل يعطى السبايـا شعيرهـا
وجدي على الفدعان [بواجة الدّيـر]
[وحمّاية العرفـا] عزيـز قصيرهـا
اللابـة اللـي تأخـذ الحـق عنـوه
يـا ويـل والله بالملاقـا نحيـرهـا
يا ليت لـو يلحـق ظعنـا ظعونهـم
عسى غليل الكبـد يبـرد هجيرهـا





موقق : قرية تقع غرب حائل 60 كلم .
وادي الديعجان : وادي الاديرع يشق مدينة حائل الان من الجنوب الى الشمال .
خشوم سلمى : وهو جبل سلمى المعروف في حائل ونظيره أجا .
نجد العذية : أي نجد النظيفة .
عشرين سمرا : أي ليلة.
دومة الجندل : مدينة معروفة في منطقة الجوف . ومقر حكم الشعلان بوقتٍ من الزمن .
صوير: الآن هو مركز لقبيلة القعاقعة من الرولة في منطقة الجوف.
الجوبة : أحد أسماء مدينة سكاكا الجوف . وفيها قصر الشعلان .
بواجة الدير أو بواجة الديار: أحد ألقاب قبيلة الفدعان .
حماية العرفا : هم قبيلة السبعة