سندسيات ...

عدنا


وبلشت سهرتهم ... وكل شوي ابني محمد داخل بابريق شاي
وطالع بابريق شاي اخر مع الكبايات ولحقي ياام محمد غسيل وتحضير
وكل شوي ارتاح بالصاله القريبه من الغرفه السهرانين فيها ...
قعدت على الكرسي اريح بدني المهدود غمضت عيوني تعبانه كتير
ونأزت على صراخ زوجي وماشفت حالي الا واقفه .... انت غشاش ..
شفتك وانت عم تسحب الورقه ... وسمعت خبطه ايدو على الطاوله
كعادته كل يوم ..
وعلا الصراخ .. وماعدت فهمت شو عم يحكو من كتر الاصوات ..
وبدون انذار سكتو الكل ... ورجعوا يلعبوا كانو شي ماصار ...
سمعت صوت زوجي بنادي ... محمد خلي امك تعملنا لقمة خفيفه جعنا ..
طلعت على الساعه كانت الثانيه صباحا .. ومحمد ياقلبي هلك ونام على
الكنبه .. الحمد لله بكره جمعه وماعندو مدرسه ...
دخلت المطبخ وانا عم جر حالي جر .. امري لله وحده ..
حضرت من الموجود عندي ... وجهزت صينيه عليها العشا وحطيتها على طاوله
جنب الغرفه ونقرت الباب ليطلع زوجي ياخدها او حدا من الساهرين ..
وانا رجعت للصاله ..
مابعرف مين اخدها .. وسمعت شي نحط على الطاوله بدالها..
رحت لشوف كان بقايا صحون الفواكه واعقاب السجاير ..
شلتهم ودخلت المطبخ اغسلهم ..

خلصت ورجعت للصاله وقلبي نايم .. وياريت اقدر نام ..
سمعت صاحبه ابو صطيف بخبر زوجي ..
سمعت انو ابو ياسر تجوز من يومين وحده فلقت القمر ..
عقبالنا يارجال ... وفقعوا ضحكة شلتني بارضي ..
جازه ابو ملعون ان شاء الله ...
رد زوجي الفصيح ... نيالو الله يطعمنا ماطعموا ...
يطعمك عقربه يابعيد .. والله نفسك خضره ...
كنت بره بعقلي ودمي يلي عم يفور عم رد عليهم ..
تفاصح ابو صطيف وقالوا لجوزي ليش ماتني ابو محمد
الحمد لله معك شو بيمنعك ...
حسيت بدي ادخل اكب ابريق الشاي يلي عم اغليه على راسو
بس قلت لشوف الافندي شو بدو يرد ...

وللحديث بقيه

عدنا

كنت قاعده على جمر منتظره شو بدو يحكي زوجي ..
رد عليه بصوت متردد ... هس هس هلق المرا بتسمعك ..
بدك ننام برا البيت ..
وانفجروا جميعا بالضحك .. وانا حسيت حنفجر غضب ..
كنت قاعده ورجلي عم تهتز لوحدها .. وعم الهث متل الثور الهايج ..
وماعدت ركزت شو عم يحكوا ... بس بدي يروحوا ..
سمعت نهنة زوجي .. داريت نفسي ..
وخرجوا يتهامسوا ويضحكوا ..
طلع معهم الافندي لباب المزرعه ..
وانا دخلت الغرفه للملم الفوضى ..
يلي بشوفها بقول قامت فيها حرب عالميه ..
سفره الاكل هنا .. وطفايات السجاير هناك ..
وقشور البزر معباي الارض .. و .. و ..

صرت انقل للممطبخ الاغراض .. ودخل زوجي
تقول ديك رومي نافش حالو وابتسامه كبيره على وشوا
قلتلوا من طرف تمي .. انبسطوا صحابك ..
وانتي ان شاء الله انبسطت ..
اختفت الابتسامه وعيونوا صارت تدور على وشي
وبينوا وبين حالوا عم يقول الله يستر..
لما بتبلش هالنغمة ليلتنا فل ..

كنت كل هاد وماسكه اعصابي ..
تركني وراح يغسل ويغير تيابه وينام ..
وانا عم ضبضب الغرفه .. وساوي المخدات على الكنب
صرخت بدون شعور ....
يييه شو هاد ..؟



وللحديث بقيه

قبل ان نعوود لقصتنا

احب ان اهنئكم بعيد الأضحى المبارك
فكل عام وأنتم إلى الله أقرب ..

عدنا ...
صرخت من حرقة قلبي وانا ارى مساند الكنبه محروقه بالسجاير
ولسه ماتهنيت فيها ...
لهالدرجه استهتار وعشر طفايات بكل مكان ..
هالامر مارح اسكت عليه ..
صرت فكر ... اروح اصحي زرجي وهز بدنه على اخر هالليل
يلا الصباح رباح ...
نظفت الغرفه وفتحت الشبابيك لتطلع ريحة الدخان ...
وقعدت اتامل هالحروق وحاسه كان النار تحرقني من القهر ..
ومادريت بنفسي الا صوت زوجي عم يلعلع بنادي علي ..
راحت علي نومة من التعب ..
رديت عليه .. يلا جاي ..
صباح الخير ..
جهزيلنا الفطور وصحي الولاد
صحيح يارجال بدي وريك شغله ..
تطلع فيني مستغرب ...
تعال .. ومشيت ولحقني لغرفة الضيوف ..
خير شو فيه ..
شاورت له على الكنب ... الحقيقه لما شاف الحروق
وجهه صار اشكال الوان .. وتمتم لاحول ولاقوة الا بالله وطلع
عرفت انه معصب .. يعني مازيد عليه ..
دخلت المطبخ وسمعته على التليفون عم يحكي بعصبيه ..
هو ادرى مين كان قاعد عليها ..
جهزت الفطور ومافتحت تمي بحرف ... مين بسترجي يحكي
كان عم ياكل كانه عم يخانق ... والاولاد ساكتين بيعرفوا طبعه ..
المهم .. فطرنا .. ولملت البيت ولميت التياب يلي بدها تنغسل ..
وبعادتي قبل ماحطها بالغساله بتفقد الجيوب ..
مسكت قميص زوجي .. وتفقدت جيب قميصه .. كان في اوراق
الحمد لله كان صرعني ..
شلتهم وبدي حطهم على الطاوله بغرفة النوم .. مابعرف شو خلاني
افتحهم ..
هاي فاتوره بضاعه .. وهاي عليها عنوان ورقم تليفون ..
والاتعس هالورقه يلي كان فيها ...

عدنا ...
كانت ورقة مطويه بعنايه ... مابعرف ليش قالي صار يدق ..
طليت على زوجي لقيته متمدد على الكنبه متابع الاخبار ..
فتحت الورقه وقلبي بتقول فيها طبول الحرب مابعرف ليش
كانت مكتوب حرفين ورقم تليفون ...
صورت الورقه بسرعه وطبقتها متل ماكانت وحطيت الاوراق على
الطاوله ورحت شغلت الغساله .. دخلت المطبخ جهز للغدا ..
والحرفين والرقم مبلطين بمخي .. وجواتي تقولوا بركان عم يغلي ..
لازم اعرف لمين هالرقم ...؟
المهم جهزت الغدا .. وصرت جهز السفره لغايه مايجي زوجي والاولاد
من صلاة الجمعة ..
سمعت الاولاد عم يتراكضوا بالحديقه .. مين بسبق الاول ..
دخلوا .. ماما شفتي سبقت احمد ..
ابتسمت .. غسلوا وتعالوا ساعدوني ..
خلصتي ماما ماضل شي ..
ابتسمت ايه امي روح غسل ايديك انت واخوك ..
دخل الاب .. رمى السلام ... ودخل غرفته غير تيابه
وغسل وقعدنا نتغدى ..
كان زوجي مو عادته .. ساكت .. واول مره مابسمع تعليقاته ..
ملح زايد .. ملح قليل ... وين المخلل .. ليش منوعه ..الخ ...
كنت عم راقب وفكر ... وقلت الصبر طيب ..
تغدينا وضبيت السفره .. وغسلت الصحون ... وكالعاده لازم الشاي
بعد الغدا ...
احمد نادي ابوك يشرب الشاي ..
راح الولد يناديه .. رجع ..
قال بابا بدو ينام شوي بس يصحى بشرب شاي ..
استغربت مو عادته .. قمت لشوف شو قصته ..
وقبل ماافتح باب غرفته سمعته عم يقول ...


وللحديث بقيه ...

عدنا ...

سمعته عم يقول .. مافيني احكي هلق بالليل بحاكيكي ..
وفتحت الباب بقوه .. الافندي زوجي عمل نفسه نايم ..
كان منظره بضحك .. بس انا من جواتي عم اغلي ..
بتخانق معه وبسالوا مين يلي كان عم يحاكيها .. والا بسكت
لاعرف الامر وبعدها لكل حادث حديث ..
هو تظاهر انه نأز من فتحت الباب .. شو في يامرا هاجمي على الغرفه
تقولي شي صاعقه ..
مافي شي ياقلبي تفركشت والباب حماني ماتواخذني زعجتك..
كنت عم احكي من طرف تمي وحاسه اسناني عاملين مطحنه وانا عم
حاول امسك نفسي ..
تركته لينام .. والولدين راحوا على غرفتهم .. وانا قعدت مع حالي
وفكره تاخدني وفكره تجيبني ...
١٨ سنه وانا عم اخدمك واخدم اهلك وضيوفك وشايلي الكل على راسي
لاجلك ... وبعدها متكافيني بوحدة تانيه ..
هزيت راسي وقلت لحالي .. شبك شو صرلك ممكن حدا بدو مساعده
ليش مخك راح شمال ..
تعوذبت من الشيطان وقمت نشر غسيلي وصرت الهي حالي بشغل في
البيت .. صرت الله وكيلكم انكش الشغل نكش بس مافكر ..
بس كل شوي حس بنار بقلبي .. طفيها بذكر الله وهيك ماحسيت بالوقت
حتى صحصح زوجي وقام توضأ وصلى .. كنت جهزت الشاي ..
شربت معاه بس ماحكيت ولا كلمة وهو كمان كان ساكت ...
بعد ماشربنا الشاي شلت كاسات الشاي وبدي قوم اغسلهم ..
يامرا اليوم انا سهران عند ابو صطيف ممكن اناخر لاينشغل بالك ..
انا تجمدت للحظه بارضي .. وعقلي بلش بالزن ..
ابو صطيف ايمت كنا .. هذا رجال كحته ومابستقبل حدا ببيته ..
مع انو دوم لازق عند اصحابه ..
ابو صطيف يارجال .. شو جوى بالدنيا حتى يستقبلكم ..
ضحك وقال ايه نحنا شلنا لوازم السهره ..
هزيت راسي ودخلت المطبخ ماخرط مخي كل هالحكي ..وقفت صافني
بهالكاستين الشاي وعقلي مو معي ...
يمكن طولت وانا واقفه بالمطبخ ماحسيت بالوقت ..
الا زوجي عم يقلي انا رايح ..
كعادتي رد عليه .. الله معك ..

طلعت من المطبخ اتفتل بالبيت .. دايقه اخلاقي
كان الوقت بعد المغرب .. شغلت ضو الحديقه وطلعت
قعدت على الكرسي جنب الياسمينه .. وعقلي عم يوديني
ويجيبني ..
تذكرت الرقم ... نطيت ورحت جبته .. كنت مخبيته بفنجان القهوة
بدولاب المطبخ ..
جبت تليفوني .. وقلت خليني غامر وشوف لمين هالرقم ..
كنت مرعوبه .. طيب شو بدي قول .. والا شو اعمل ..

بلشت اكتب الرقم ...
وبنصو كانت الصاعقه ...



وللحديث بقيه

عدنا ...

كان رقم بنت عمي ... ليش رقمها عند زوجي ..
يلي سمعت انها تزوجت بعد طلاقها بسنه .. وسافرت
لاعزمتني واصلا ليها سنتين ماحكيت معي ..
كنت اتصل عليها كتير بس ماترد ..
تغيرت بعد مامات عمي ومراته بحادث سير .. وتزوجت رفيقها
في الجامعه ومااتفقوا وطلقت ..
وبعدها سمعت انو تزوجت مره تانيه ومو قاعده بالبلد ..
مر بعقلي كل شي عنها وانا عم بحلق بالرقم ..
لازم اعرف شو قصتها ...؟
قطعت الورقه يلي كاتبي فيها الرقم ودخلت البيت
عم اضرب أخماس بأسداس وماوصلت لحل ..
كانت اعز رفقاتي ومابعرف شو صابها وبعدت عني
وماعادت تواصلت معي حتى ماعدت عرفت شي عنها الا
يلي بقولوه معارفها ..
بس لازم اعرف ليش هالرقم مع زوجي ..
يلا الصباح رباح ..
وبعد ماعملت برمة على البيت وتفقدت الاولاد ..
لقيتهم بسابع نومة منشان يصحوا بكير لمدارسهم
الله مااعطاني دخيل اسمه الا هالولدين الله يحميلي ياهم
ودخلت غرفتي وتمددت على سريري ريح بدني بلكي بيهدى مخي ..
ورحت بالنوم ... ومابعرف شو يلي صحاني انتفضت من فراشي واقفه
اعوذ بالله اعوذ بالله ..
مابعرف ليش ركضت لغرفه الاولاد .. الحمد لله نايمين
قربت منهم لاطمن انهم بخير ..
لك شبني .. شو عم يصير معي .. مجنونه ..
هيك صرت احكي مع حالي ..
رحت شربت مي .. وقلت ارجع نام ..
طلعت على السرير ... زوجي لسه مارجع ..
معقول لهلق سهرانين .. ليش قديش الساعه ..
تطلعت على الساعه في الموبايل كانت خمسه الصبح ..
انشغل بالي .. رنيت عليه .. مافي رد
رجعت رنيت .. كمان مافي رد ..
يالطيف شو صاير ...
وصابني القلق وماحسيت بنفسي الا ورنه ورا رنه على موبايلوا
بيعرفني بسرعه بقلق ..
ورجعت رن اعطاني مقفل ... هون ماضل براسي عقل ..
ياربي خير ... شو صاير ؟
عمرو ماتاخر هيك ..
بمين بدي اتصل ؟
بتصل بام صطيف بسالها ..؟
بتكون نايمه وعيب ازعجها ..
ياربي ...


وللحديث بقيه

عدنا ...

طلع النهار وانا القلق ماخلا فيني عقل ...
وعم انتظر بس تصير الساعه تمانيه لاتصل بام اصطيف واطمن
واخيرا صارت الساعه تمانيه ...
مسكت تليفوني وايدي عم ترجف .. انا اصلا كلي عم يرجف ..
اتصلت بام صطيف ..
الله يسعد صباحك ...
وصباحك خيتووو كيفك ..
مشتقتلك عمري ..ماتآخذيني اتصلت فيكي ع الصبح ..
ولايهمك قلبي .. خير ان شاء الله..
بدي اسالك ياعمري امبارح قال جاي يسهر هو والشباب
عند ابو صطيف ولهلق مارجع قلبي متل النار ...
يييه مو صحيح هالحكي ... امبارح كنا سهرانين عن اهلي
وسمعت انو اعتذروا على السهره لانو جوزك عندو قالوا شغل ..
انا ماعدت سمعت شي .. يالطيف شو صاير ..
مابعرف انا سكرت المكالمة هي سكرت مابعرف ..
لك حتى الاولاد طلعوا راحوا للمدرسه مانتبهت ...
قاعده مبلهة مخي وقف ..
رن تليفوني .. كانت ام صطيف ...
اسمعيني ياعمري ... وتطمني جوزك بخير هلق حكى معو جوزي
بعرف قديش قلقانه والله حاسه فيكي ..
صحيت جوزي لطمن عليه وجبتلي الزبده ..
ماطلع مني غير الحمد لله وانفجرت بكي ..
وماعدت مركزه على حكيها ...
اعتذرت وقفلت .. هلق بيجي وبعرف وين كان وشو صاير ..
بكيت كتير ... والله على حرقه دمي ... مابيعرف يطمني
لك صحيح ليش كذب عليي ... عمرو ماعملها ..
لا في شي غلط ..
قمت غسلت وجهي ودخلت المطبخ عملت فنجان قهوه يروق اعصابي
وطلعت للحديقه لمكاني المفضل اشرب قهوتي ...
رن جرس الباب ... مين على هالصبح جاي خير ان شاء الله ..
رحت لشوف مين ..
نسيت خبركم نظام بيتي صاير نص الارض زارعها زوجي فواكه وباني
في النص التاني نظام فيلا ..
مين ... افتحي انا ام صطيف ...
بيني وبين حالي .. يووه شو جابها هلق ...
فتحت .. اهلا وسهلا .. تفضلي ..
بالمهلي عيوني ... قلت اجي اشرب معك القهوه ..
يااهلا وسهلا والله جاهزه ..
ارتاحي لجيب فنجان وصبلك ..
دخلت البيت وانا مخي رجع لجنانه ..
عمرها مااجت لعندي الصبح .. وبتجي على الرسمي ..
الله يكفيني شرها ..
طلعت وقعدت على الكرسي المقابل الها ..
صبيت القهوه ... انا من عادتي بعمل ركوه قهوه كبيره ..
بمزمز فيها برواق وبعدها بقوم لشغل البيت ..
اخدت شفه من قهوتها .. وانا مستنيه تحكي ..
لانو باين بوجها حكي ..
سبقت بالحكي صاير شي ام صطيف .. امانة جوزي
صاير معو شي ..
لا والله جوزك بخير .. شبك جاي اشرب القهوه معك ..
بصلاة محمد ام صطيف شو فيه ..
سكتت .. وحكرت راسها محتاره .. وبقت البحصه ..
اسمعي حبيبتي ... بعرف مافي بينا زيارات خوش بوش
بس يشهد ربي انو بحبك .. والكل بحترمك وبقدرك ..
وبيحكو عنك بكل خير ..
شو فيه رعبتيني ..
بس انا جاي مخصوص لفتح عيونك .. ولانك مابتستاهلي
لك شو فيه ..
جوزك متزوج .. وهو عند مرته التانيه ..
انا هون حسيت كانو قنطار مي انصب علي ...
ومين متزوج ...
والله مابعرف شو خبرك ...
مين ...

وللحديث بقيه

عدنا...

نشفتي دمي .. خبريني مين تزوج ؟ وايمت ؟
كنت مصدومة ... عمره مانام بره البيت الا لما بسافر للشغل ..
معقول كان مافي شغل وبضحك علي ..
اخدت رشفه طويله من القهوة .. ونطقت اخيرا ام صطيف ..
شوفي ياتشكلي آسي .. وسكتت ..
والله مابعرف شو خبرك ..؟
يييييه خلصينا حرقتي دمي ..
متزوج بنت عمك ..بعد ماتطلقت ...
حسيت كان جبل انهار علي وماعدت دريت بشي
الا ام صطيف عم تمسح وجهي بمي وحسيت بريحة العطر
بانفي ..
كان جسمي كلو عم يوجعني ... وللحظات نسيت شو صار
حتى تطلعت بام اصطيف مستغربه ...
والتانيه قعدت على طرف السرير عم تتنهد وهي بتحمد الله ..
وفجأه تذكرت .. تجلست بسرعه .. وانا مستغربه كيف صرت بسريري ..
مسكتني ام صطيف ورجعت سطحتني لان لما قعدت بسرعه دخت ..
شو صارلك .. والله قطعتي قلبي ..
حكيت بصوت يمكن انا ماسمعتوا ..
شو جابني لسريري ...
ضحكت ام صطيف .. انا يخزيت العين عنك بخف الريشه
رديت عليها بشبه ابتسامه ..
راحت جابتلي كاسه ليمون .. قال منشان صحصح ..
وبعد مارقت قمت من سريري وطلعت للصاله وهي ياحرام
عيونها علي بس ماعادت حكيت ولاكلمة..
بعتذر منك وماتآخذيني .. والله انصدمت ..
ماضل حدا الا بنت عمي .. الله يسامحهم ..
ماعدت حبيت اعرف شي ..
كنت قررت وانتهى الامر ..
شوفي ام صطيف بتخبري زوجك يبلغ يلي مايتسمى
على البيت لهون ماعاد يجي ...
وبكره بطبقلوا اغراضه واذا مافي سئله تودوهم انتوا..
قالتلي ام صطيف .. طولي بالك .. مو اول ولا اخر واحد
بتزوج على مرته ..
قلتلها صح .. بس مو بنت عمي ... ويكذب علي ..
لك شو قصرت معوا ..
على علمك وعلم الجميع ..
مابكفي فاتحة بيتي مضافه وللعب الشته (ورق اللعب )
ومتحملي القرف والتعب وصابره المهم يكون مبسوط ..
لك مقضيتها بس الطبخ واستقبل وودع ..
وراضيه .. حتى مابطلع من البيت لانو ماعندي وقت ..
وبالاخير يتزوج علي ...
تركت دنيتي لعيش دنيته .. لا ماعاد بدي شوفوا ..
وانا بقمة غضبي انفتح الباب الداخلي ...
التفتت والا هو ...

وللحديث بقيه

عدنا ...

لما شفتوا تجمدت الدم بعروقي ... وحسيت كان براكين جواتي
استنى .. ام صطيف هون ..
ردت ام صطيف .. انا رايحة تاخرت بجيكي المسا ان شاء الله ..
طلع هو للحديقه .. وتيسرت ام صطيف لبيتها ..
وانا كنت واقفه بالصالون منتظرته يدخل ...
طبعا فهم لما شاف ام صطيف عندي اني عرفت كل شي ..
دخل ووجهه بلا تعابير ...
السلام عليكم ..
وعليكم السلام .. بكير يارجال
اسمعي ياحرمة ...
مابدي اسمع شي .. بتضب اغراضك وتتوكل على الله
انتي انجنيتي هذا بيتي ...
لا مو بيتك هذا بيتي وبيت اولادي ...
اسمع يارجال الله يسعدك ويهنيك ..
ومابدي كتر كلام .. يلي صار صار ..
بس انا مارح سامحك لا انت ولا هي ...
مالقيت غير بنت عمي ...
كنت حاسه بالم في قلبي .. ووجع مابعرف وصفه
لك عمري ماقصرت معك .. ولا مع اهلك وكل احبابك
انهديت وانا بخدم الكل .. وبعدها هاي مكافأتي ..
ارجع من محل ماجيت .. ومابدي تكبر القصص ...
وانا الي رب اسمه الكريم ...
اسمعي ... انا رايح ...وبس تهدي منحكي ...
طلع .. والله مابعرف اذا طلع فورا او دخل اخد شي
من غرفه النوم ...
كنت حاسة بان الدنيا عم تدور فيني .. وكل جسمي واجعني
وكاني في دوامة مالها نهايه ...
ماوعيت الا على مي على وجهي .. والاولاد مرعوبين جنبي ..
ماما ماما اصحي شبك ..
وين بابا ...
اتصل احمد بالبابا يجي ناخد ماما للدكتور ...
رفعت ايدي بمعنى لا استنو ..
ساعدوني لقعدت ...
لقوني الاولاد مغمى علي الارض ..
انا بخير ماما ... لاتخافوا ...
لاتتصل ببابا لانو مسافر عنده شغل ...
الاولاد ماعلقوا عارفينه دوم بقرر السفر فجأه ..
وبعد ماصحصحت .. حبوا الاولاد يدخلوني غرفتي ..
ماما انا منيحه .. لاقوم جهزلكم الاكل ..
لا ماما هلق منحضروا انا واخي انتي قومي ارتاحي ..
رح نغديكي من ايدينا ..
الله يرضى عليهم .. دوم كانو سندي ..
وفعلا دخلت غرفتي وتمددت على سريري ..
وكنت عم بحلق بالسقف ومخي فاضي ...
جواتي حاسه بالفراغ ...
شو قول للاولاد .. مولازم يعرفوا ..
خليني اهدى وبعدها بقرر ..
واجى ابني نادالي للغدا .. مالي نفس باي لقمة
بس مابدي اقلق الاولاد اكتر ..
كانو مجهزين سفره غير شكل ..
والله يامضروبين فنانين ... ضحكوا تلامذتك ماما ..
وقعدت اتغدى معهم .. وكاني باكل بلحمي بس غصبت
على نفسي منشان ولادي ..
المهم كان لازم لاقي حل بموضوعي ...


وللحديث بقيه