ديوان الشاعر/الأطرق بن بدر الهذال

دنياي ضاقت في عيوني حدودهـا


وسعادتـي مايـوم بيّـن وجودهـا
من يوم راحت وابعدت عن نواظري


حبيبتي . والحال ماشفـت زودهـا
فارقت انا فرحـة حياتـي بدنيتـي


والعين عافت من بعدهـا رقودهـا
راحت وانا مقدر على الصبر بعدها


واوجست في قلبي وكبدي لهودهـا
مهموم انا ماكن حولي من البشـر


كنّي سجينٍ فـي معاقـل يهودهـا
ياطول ليلي كـان الأيـام مااقبلـت


تحمل تباشير الفرح مـع ورودهـا
وياشيب عيني كانها حيـل طولـت


في ديـرةٍ عنّـي بعيـده حدودهـا
حبيبتـي لايمكـن أعيـش دونهـا


نهر الحنان اللي غمرنـي بجودهـا
فيها الوفى كلّه وهي منبـع الوفـى


تحفظ غلاي ووافيه فـي عهودهـا
فيها الجمال ولا ادري شلون اوصفه


سبحان ربٍ صوّره فـي خدودهـا
فيها الحيا وفيها الـدلال الأنثـوي


وفيها التغلّي لايـقٍ فـي ركودهـا
الله محـلا عتابهـا كـان عاتبـت


ومحلا رسايلهـا ومحـلا ردودهـا
وليا همست ضاعت علومي وصابني


شيٍ يتل الـروح منّـي ويكودهـا
وليا مشـت بيـن الغناديـر كنّهـا


عنود صيـدٍ والجـوازي تقودهـا
مالاق في عيني من البيض غيرهـا


في همسها وفي زينها ولين عودها
يارب تحفظهـا وتحمـي شبابهـا


وتصونها عن نظرةٍ من حسودهـا
وانا عليها اخاف من نسمة الهـوى


وادرى مشاعرها وحافظ سدودهـا
يارب تجمعنـا بشرعـك وسنتـك


وتريّح قلوب الوفى مـن زهودهـا
عن دربنا يارب تبعد اهـل الحسـد


وعيون خلق الله وتبعـد حقودهـا

ديوان رائع بمعنى الكلمة

الف شكر على ما كتبته وعساك على القوة

ويبيلنا اكثر من زيارة لهذا الموضوع

والف شكر للغاااااالي فرج الدهمشي

بيض الله وجهك

كما يشرفني اني صاحب اول مشاركة في هذا الموضوع

صح لساااااااااااانك مليااااااااااااار على كل حرف رسمته ابا سلطان

المشاركة الأصلية كتبت بواسطة وليد الخالد الغبين

ديوان رائع بمعنى الكلمة

الف شكر على ما كتبته وعساك على القوة

ويبيلنا اكثر من زيارة لهذا الموضوع

والف شكر للغاااااالي فرج الدهمشي

بيض الله وجهك

وليد الغبيين

لا شكر على واجب وبيض الله وجهك على مرورك ولاهنت

صوت وصدى


بندر البجيدي

ياالاطرق الهذال يـاذرب الايمـان

يلّي على درب المواجيـب عـازم

أنا نصيتك يانسـل روس ويـلان

والراي عنـدك ياحفيـد الزيـازم

وش خانة اللي حدّته قشرالازمان

وصكّات بقعا مع همومـه تـرازم

أزرى يعبّر بَه على نطْقت لسـان

من زود ماهـي بالحنايـا تـلازم

واصبح سهير الليل لين الشفق بان

بأمـر(ن) مهـم لازم ينفّـذْه لازم

يصارع الفكـر الجنونـي ولا لان

مابين مهزوم(ن) وأحيـان هـازم

لكن ظروف الوقت حالت بنقصان

والحظ عوكس به بوقت اللـوازم

والفارس اللي ينقصه مثل شامان

زي الرجال اللـي بليّـا محـازم

وش حيلته ،والدرب مظلم وخوّان

وقلبه على خوض الصعيبات جازم

ردي المتواضع

هلا بوجود اللي عزيزٍ وله شـان

هـلا ببنـدر صاحبـي باللـوازم

يامرحبا حييـت ياطيـر حـوران

ياللي على كسب الطوايـل تـلازم

ابشر بعـزك لاتفكـر بالأحـزان

ولخاطرك أقضي تـرى كـل لازم

لاتشتكي جور الليالـي والأزمـان

جيتك وانا باللـي يريحـك عـازم

امشي معك ياصاحبي وين ماكـان

وان قلت لك ابشر ترى القول حازم

قلي وش اللي ضيق البال يافـلان

وانا معك فـي كـل أمـرٍ مـلازم

ان كنت تشكي من مطاليب ديـان

واصبحت مهزومٍ وأحيـان هـازم

اعرف ترى ربعك طليقين الايمـان

محزمك لاقلّـت عليـك المحـازم

ويلان فيهم للسعـد دوم عنـوان

وفي طيبهم جيتك وانا حيل جـازم

وكان السبب ياصاحبي نار خـلان

والبعد عن وصل العزيزين خـازم

اطولهم لوهـم بعيديـن الاوطـان

واسوق جاهي للرجـال الزيـازم

اصبر ترى الدنيا تبي صبر وايمان

وامر الولي تشوفـه العيـن لازم

الاطرق بن بدر الهذال

ديوان رائع للشيخ الشاعر /الاطرق الهذال

مجهود جبار اخوي فرج

لك جزيل الشكر

تقبل مروري واحترامي

الا ياطير خبرني وش اللـي صـار للأحبـاب
ترى قلبي كثر همّه سبايـب غيبـة احبابـي

غريبه عنّي يسافر ولا اعرف للسفـر أسبـاب
كذا فجأه يودعني ولا أدري أيـش الأسبابـي

ترى بعده عن عيوني يهد الحيل والأعصـاب
يمر الوقت بغيابه وأنا عايش على اعصابـي

الا ياطير ماعندك خبر عن عـودة الغيـاب؟؟
ولا تقدر تطمنـي تجيـب علـوم غيابـي؟؟

ابي ياطير لامر بسماك من الطيـور اسـراب
ابيك تعانق اسرابٍ تجي من بعدهـا اسرابـي

ابيك تفتّش الدنيا . تدوّرلي عـن الأصحـاب
تجيب العلم ياطيري وتطمّني عـن اصحابـي

لك الله ليت جنحانك عليّ وماحسبـت حسـاب
اطير بصحبـة الغالـي ولا فكـرت بحسابـي

اروح اسكن على قربه وأخلي الباب حول الباب
اشوفه لافتح بابه وانـا واقـف علـى بابـي

ادنّق لابدى حوله من اهلـه لايجيـه عتـاب
وهو يرسلّي النظـره بليـا خـوف وعتابـي

اخلّي خافقي يدلـه بقربـه ماتجيـه اتعـاب
واذا ناظرت في زوله نسيـت الهـم وأتعابـي

سقاك الله يايومٍ بـدت بـه نظـرة الأعجـاب
حضيت بنظرة اعجابه وهو يستاهل اعجابـي

سحرني صوته الدافي حنون ومنطقـه جـذاب
وفيت لقلبه الوافي وهـو بالوصـف جذابـي

اله الكون لاتفجع خفـوقٍ مـن غلاهـم ذاب
تلوّع سبّة الفرقـى وهـو مـن قبلهـا ذابـي

الا ياطير خبرني وش اللـي صـار للأحبـاب
ترى قلبي كثر همّه سبايـب غيبـة احبابـي

مشكور جدا اخى على ديوان

تقبل احترامى

المشاركة الأصلية كتبت بواسطة الفهدالوايلي

ديوان رائع للشيخ الشاعر /الاطرق الهذال

مجهود جبار اخوي فرج

لك جزيل الشكر

تقبل مروري واحترامي

الفهد الوايلي

نحن ننتظر أبداع الشاعر الأطرق آل هذال وما به قلمه على أحر من الجمر

وقفت هنا ولي عوده لهذا الجمال الروحاني