كل ما يجول بخاطري وخواطركم نضعه هنا

‏لا بغيت تعيش مرتاح الضمير
الحقد والحسد لايطري عليك

وان بغيت العز والمجد الكبير
طاعة الله ثم طاعة والديك

‏لا طالت الخوة تبين العذاريب
تعرف قراح البير والا هماجه

ابعد عن اللي لا زعل ينكر الطيب
اللي تقلب عشرته مع مزاجه

‏بعض العرب لا شاف نعمة حسدها
حاسد ويحسد فالسماء حايم الطير
،
وبعض العرب لاشاف نعمة حمدها
من طيب قلبه وده الناس في خير

قدر مـقام اللي يقدر .. مـقامـك
واجز الذي عاملك بالخير خيرين

أحـذر تنقص لـلـوفـي اهتمامـك
مايجحد الـوافيـن غير الـردييـن

تمر الوجيه العابره مع مرور السير
وكلن يروح وينحفظ ذكره الطيب

عسى ذكرنا ما يذكر الا مع أهل الخير
وعسى الله يجملنا مع بعيد وقريب

ياحلم وين المشكله لو تحققت
تعبت من سود الليالي ونكدها

البارحه من ضيقة البال مانمت
تضرب هواجيسٍ بصدري عمدها

نطيب للي يطيب ونجحد للي جحد
حتى الجبل لاعطوه الصوت رد الصدى
..
من قدم السبت ... ماقدامه الا الاحد
وكلٍ يجازي بفعله ... طيب والا ردى

الطيب قصـر مايشوبه عذاريب
والتربيه هي سور قصرك وساسه
.
من لا تربى في شبابه على طيب
ماهو بـ متربي ليا شاب راسه

ياشين طبعٍ عند بعض المخاليق
يظن فيك السوء قبل الحقيقة

على كلام الناس سريع تصديق
وينسى العلوم الطيبة في دقيقة

قلوب بعض البشر هذي طبيعتها
من خلطة الحقد مصبوغه ومدهونة

لا تحاول بـ طيبتك تكسب مودتها
مهما غسلت الفحم يبقى على لونه