قصيدة الشاعر معجب الصقيري 🔰يابشر عقب المحبه ومن عقب العتاب🔰

يا بشر عقب المحبه ومن عقب العتاب
سود الله وجه من لا زعل باع الضمير

لو كتبت من الوجع في حياتي والعذاب
كان صرت الشاعر اللي حمل بردة زهير

شلت حملٍ ما صمل والسبب ريشة غراب
يوم طاحت ريشته حطمت ظهر البعير

وياعذابي كل ما رحت وأغراك الاياب
مايضر الميت الضرب من عقب المصير

ليه ضاع العدل بين الخطا واهل الصواب
ليه صوت الحق خايف من الجمع الغفير

ليه شح الغيم يوم ارتكى غر السحاب
ليه غاب النور في محجر الطفل الضرير

من شرب نبع الوفا يكره ايام السراب
حسبي الله من رمى بالحجر وسط الغدير

والوداع إن كانه اول مراسيم الغياب
رزقي عند اللي خلقني وانا عبد فقير

و ياحنيني كل ما اشتقت لايام الشباب
اذكر انك منت الاول ولا صرت الاخير

و ياديار حبها ساكنن وسط الحجاب
والله اني مانويت البعد قبل أستخير

دام هالدنيا عبور والسكن تحت التراب
يالله إني طالبك والعمر كله قصير

كلمةٍ في خاطري كان للمظلوم باب
بطلق عنان الحروف لا سرت عبر الاثير

من كسى أيوب ثوب الصبر عقب المصاب
يرحم اللي ضاع عمره وهو مثل الاجير

إنتهى حبر القلم وإكتفى صدر الكتاب
ولا شكيت إلا لرب السما نعم النصير

ودعوة المظلوم لا عطرت فصل الخطاب
بشر الظالم بيومٍ عبوسٍ قمطرير

الشاعر / معجب الصقيري