ديوان الشاعر/عويد كسار (بحر القصيد)

اعضاء و زوار شبكة مضايف عنزه السلام عليكم ورحمة الله وبركاته تم بحمد الله افتتاح ديوان الشاعر المبدع الشاعر/ عويد بن كسار المضياني العنزي ((بحر القصيد)) والتي يشمل جميع قصائد الشاعر نأمل ان تقضو هنا اجمل الاوقات وتجدون مايسركم ولكم اجمل واطيب التحايا

(مـــركــب حـــطامـــي) قلتي بحرك مجمل احساسك الميت يمكن نسيتي وش ورى بحر الأشعار اللي بنى مركب حطامي مهو بيت ديواني المكتوب في لوح الأقدار في قطرةٍ من مي وجهي على الزيت قدحت لـك بدموع عيني لهب نـار حـتى رقيت هـنـاك شمت وتعليت لـو يبرد الشريان من دمـك الحـار ياعـرقي اللي ماخبرتك تـرديت لو علقت روح الردي فوق الأسوار تكفى ياقلبي قلت وينك تعزويت شفني طليب الدم جـالي عن الدار عنّـزت ادور فزعة اللي لهم صيت يامـزبن المضيوم يامحشم الجـار وأستوحشت بضلوع صدري ورديت مدري طليب الثار أو طالب الثـار أعـدهم بنجـوم ليلي ولااحصيت واقيسهم بالقاع في خمسة أشبـار حـزبٍ مع الشيطان راحو طـواغيت وحزبٍ مع الرهبان في دين الأحبـار وجنايـزن واكتاف شـالت توابيت مدري وراه جـدار او بعـده جـدار كـانو طـرايق وادي ٍبالعـفاريت منزالـهم بالـقاع في طارف الطـار جتك القصيده بس لحظه بقى بيت توقيع ابن كسار في نظم الأشعـار انا البحر لوكان غيري بحـر ميت وأول جموح الخيل في بنت الأفكـار ---------------------- (تــــوقيــع شـــاعـــر) ماهي ورق واقـلام شاعـر ومطبـوع طرق ٍلأبن كسار من خلف الأضلاع بـطاقـةٍ بالـعـز ترقـى بنـا طـــلـوع سلم ٍ لـنا موروث باقـي ولا ضـاع ترحيبةٍ من طش غيمه لها اسبـوع وقت الوسم والخير سالـت بـه القـاع تسري مـع البـراق وتولـع شمـوع وتصبح مع الـوردات معزوفـة ايقـاع وادي بدنه قدام عرعر مشـى قطـوع وريح المطر قـدام تفـرد لـه شـراع مـن وايـل لعنـاز وصدورنـا دروع ورث الأسد لاغاب مركي على سبـاع بيـتٍ مسـوبع ربعـته تكــفـي جمـوع ما ظاق صدر البيت وفجوجـه وسـاع يوم العدامه سيف سقنا الزمـن طـوع صعبه على وجه الزمـن يلـوي ذراع تلقى مصب السيل مـن عالـي فـروع سيلٍ غدى توقيع في قسـم الأبـداع بحر القصيد~

لاتستطيع كلماتي التعبير عن مدى اعجابي بقلمك وما تحمل يا أخي العزيز من غزاره شعريه قل من يهبه الله اياها لقد وصلت الى حد ان الشعر يقف عاجزاً حتى تلهمه فأنت الشعر بأحاسيسك التي تترجمها لنا شعراً يجوز ان من يقرا كلماتي يعتقد انني أبالغ ولاكن من يعرف من هو بحر القصيد عن قرب سوف يقتنع بكل كلمة كتبتها وأبقى مقصر في التعبير عن فلسفتك الشعرية وأخيرا وفقك الله يابحر القصيد

( من موطن الغربه )

بسم الغلا بسم اللقا بسم الاشـواق=وبسم المحبه والـوفا والمـشاريه
وبسم القصيد اللي ملك سحر الأذواق=ترحيبة الغالي على شوف مغليه
مـن قـبل قرص الشمس ينزل بالآفاق=ذيب ٍعلى رجـم القـصيده مساريه
لـجّـة عليه ضـلوع صدري والأعماق=واليا سمعت الصوت جيته مخاويه
ياذيب صدري من عـنا الوقت ماضاق=منازل الحاضر على أطلال ماضيه
كان السفر قطعة عذابه بالاوراق =واللي حطب سطح السفينه غرق فيه
صب الجـنون بـكاس عـقله ولا فـاق=ولا لقى بـين الـبشر مــن يصحيه
من موطن الـغربه عـلى مـوعد فـراق=ومن اصدق وعود الـغلا يـوم الاقـيه
والشعر شيخ ٍ مابنى لـبيته رواق=ياحظ منهو بـيت طـيبه مـذريـه
اللي ملا عين الـرجا بـين الاحداق=لامـن ذكـر وقـفات عــز لبنيخـيـه

بحر القصيد~

( في مملكة شعري)

شاعرنبط خذني على كل الأحوال=في مملكة شعر النبط والحماسه
واثق ملك والفكر يمشي ويختال=وصف الحروف بموكبي للرئاسه
الشعر نزف وجرح من واقع الحال =وكلن على جسمه يفصل لباسه
لاتسأليني وش ورى ضيقة البال=ماهي على صدر الشمالي وناسه
فرع انحدر من سيل وادي على الجال=حتى وقف والذيب عاوي براسه
عز الفقير اللي وقف وقفت رجال=نفسه يجدها دون ربعه وناسه
الى هنا والكون ياقف له اجلال=دنق عليه وحب خشمه وراسه
من يمدحك بالشعر نافق يبي مال=ماهو لك أوفى من كلاب الحراسه
من حكمة المجنون لك شاعرن قال=مفهوم وضع المعرفه من أساسه
شاعر نبط خذني على كل الأحوال=بين السياسه والغزل والحماسه

بحر القصيد~

(آخر دواء الكي) كل شي طلبته قلت ياصاحبي جـاك حتى العمر وان راح لجلك ولا شي وكانه هنا عمري مصيره بيمنـاك ملك السعاده شي لـ الله مهـو لـي قررت أبنهي رحلة اليأس وانسـاك حبك طوى صفحات عمري معه طي يمكن غرورك حطم الحب وانهـاك اوهوضميرك كان يمّي مهو حـي امسح دموعك بـس ماينفـع بكـاك خلك تعيش العمر دوني بـلا ضـي تتوه في سكـة ضياعـك بممشـاك ماينفعك صاحب ولا ينفعـك خـي حتى قريبك لاقشر الوقـت خـلاك ميت عطش مأسقاك من شربت المي خلك تشوف اللي على الدرب قـداك يوم الغلا شالك على راحـت ايـدي لكن عزايه مـات قلبـك وعـزاك ومثلك سحابة صيف تقبـل وتقفـي وداويت انا راحت وجودي بفرقـاك ومبطي ترى مقيول آخر دوا الكي . . . بحر القصيد~

فارس وريثك ياوسيع البنايد مابين صدر وعجز بيت القصيده=ياذيب ياللي فوق رجم القصايد فكره جديده بس ماهي جديده=الناس قالو مرضي الناس كايد والميزه اللي فيك تبقى وحيده=الطيب ينقص وانت طيبك تزايد شاعر على الجزلات تنقى الفريده=من راس قوم ٍفعلهم بالشدايد وجموح خيل الأوله والعنيده=ومخلب عديم ٍسطوته بالهدايد ومن يشبهك مايظلمك يالوليده=وفارس وريثك ياوسيع البنايد قلب العدامه نبض حامي وريده=سيف ٍمن الدغمان فارس وقايد يالله عسى دنياك تبقى سعيده=وابوك يفرح مايشوف النكايد كم شاعرن تلقاه داخل بريده=لويجتمع ماصار عنصر محايد وكلن على ماقيل يشحن رصيده=مارزّة الشعار كــثـر الجرايد ياذيب ياللي فوق رجم القصيده=لو ماتجي بأحضار عفت القصايد

( حاجز الصمت )

يسعد مساء ليل القصايد على شفاك=في بحتك صوتٍ كسر حاجز الصمت
واليا رجع صوت الصدى يقهر عداك=حقد الحسود اللي كسر نابه الشمـت
كم قطعةٍ مـن قلـب حاقـد تبـلاك=واليا نزفت الجـرح عـزه تلائمت
يالله عساهم فدوتك مـن ضحايـاك=لامـرك الجاهـل تعـدى وسلمـت
شعري وأنا والليل نذرك وصمنـاك=ماعدت أجمع بيت واحـد تلعثمـت
وأنا الدخيل اللي زبن يطلب حمـاك=عزيز قومٍ قـال تكفـى ولا أنظمـت
مهمـا كتبنـا بالغـزل ماوصفنـاك=في صفحة الدنيا قريـت وتعلمـت
نفطر غلا صوت القصايد على شفاك=في بحتك صوتٍ كسر حاجز الصمت

بحر القصيد~