سيـــرة والــدي عشــوي بــن الخــضــير الحبلانــي رحمه الله

اذكروا محاسن موتاكم وللأجيال القادمه أحب أن أكتب لكم عن

سيـــرة والــدي عشــوي بــن الخــضــير الحبلانــي رحمه الله

دايم الاولين لهم مكانة خاصة في قلوبنا ونقتدي بالرجال النبلاء عامة لانهم هم الخير والبركة,,, كتبتها لكم لإحياء ذكراه وقدوة للأجيال القادمه, الكل يذكر فعل عشوي الخضير بالصفات التي اذكرها وبكل فخرا واعتزاز

كان والدي عشوي ابن الخضير له دورا كبير وواضح ومشهود له عند الجميع بالشجاعه التي كلما نسمع عنها نقول رحمك الله

كان هو دايما يامرنا بالفرض منذ الصغر المحافظه على الصلاة ويرشدنا على العلم ويقول الله الله بالدراسة وكلمته دايما يابوك الي ماعنده قلم ما يعيش بهالدنيا يقصد الشهادة التي ترفع الرجال بالمركز وكان دايما يوصي بصلة الأرحام واكرام الضيف وواجبنا نحو الكل وكان دايما يفرض احترامه على الجميع

عشوي بن الخضير خواله هم الدليم وهم الريشة

وكانت علاقته مع شيوخ عنزة طيبة وهم الهذال والمرشد شيوخ السبعة وكان الشيخ محروت الهذال دايما يثنى عليه و يشهد له بالمروه وهذا مانسمعه من الكبار ولله الحمد كان والدي رحمة الله عليه يملك الصفات الرجوليه وللان هو مذكور بالخير بين الناس وهذا فضل من الله

وكان يملك الحكمة رحمه الله وكثير من الناس يأتون لاستشارته بالامور وكان حكيم بفعله ووفي بكلمته لهم اذا اوعدهم

انا جالست ناس من الحبلان وكانو يذكرون لي من قصص وحكايات لو الدي رحمه الله منهم الاخ عايد الكحله رحمه الله يقول كان والدك فاتح بيتة وديوانة للجميع ولا تضيق عينه من احد وشهد له الاخ سمير الجديد الحبلاني ومثقل الحمران وفريح عواد المطرفي العنزي وفهد العفص العنزي ومنيف الشيحمه الحبلاني ودميثير ابو سلامه رحمه الله و مخلف المنصور ابو صلاح كان دايما يمدح بوالدي

هولاء اللي ذكرو لي المواقف وكثير لم تحضر لي اسماهم ولهذا انا قررت ان اكتب لكم في المنتدى لتتعرفوا على ابناخيكم رحمه الله

وكنت انا اسمع من الرجال بهذا الكلام وكان شعوري بالفخر كبير بين نفسي بوالدي رحمه الله

راح اذكر لكم من القصص والقصايد اللي عرفتها:

هذي قصيدة له :بمدح الشيخ محروت الهذال رحمه الله يقول الشاعر عشوي الخضير

بمدح راعي الجود محصل الجود.....سر ياقلم واكتب جميل القوافي
في مدح من يستاهل المدح ويزود...ماهو خسارة لامدحتك بقافي
شيخ ليا عدو اهل الطيب معدود...وللطيب كلن شاهدن لك اسنافي

وطويلة هي بس ماتحضرني ابياتها

وفي قصيدة تثني على الاخ هادي شبار الحبلاني يقول فيها

يابو فرحان مثلي ليا ضاقت الحال ...مالت على غيرك ضنون وهقاوي
يلقا على فية مو اقيفك ظلال ... ماهمه ان كثرت عليه البلاوي
مدامك من سلالة مو اريث الابطال ...ابطي وراسي بالليالي غناوي
لك فزعة تذكر مع كل رجال .. يامعانق طيوف السما يالنداوي

وهذي قصيدة بالاخ مطر الفحيل رحمه الله ابو فهد يقول وارسلها مع مويس اللحيدي .. يقول

جيب القلم واكتب لي اشعار ..سلم على من هو بعالي مقامي
معرب الجدين حرا من احرار..يستاهل المدح وفوقة وسامي
راعي الكرم والطيب به عز وافخار ..حرن ولد حرن من فوق حامي
يفرح لو زاره على البيت خطار .. مطر ابو فهد يابن الكرامي

لا تحضرني كامله..


وكان له قصة مع احد زملاه بالعمل عندما صار له حادث وطلب من الضابط اجازة لان صار برجله ورم كبير ورفض الاجازة وكان زميله بالعمل ابو مرضي المضياني وقد قال والدي رحمه الله الابيات هذي يثني بها على ابو مرضي ويقول:

سلم على وسف للعود...يوم الرجل شى ممشهها
ولولا ابو مرضي حياتي زهود ...جمالتة ابد ماتناسها


وله من الابيات التي حصلت عليها من الكبار يقول بالابيات هذي عن الطيب

الطيب في بعض الرجاجيل ضايع ... والا بعضهم يجزي الطيب بالطيب
دامك فعلت الطيب خلة ودايع ... ودايع يعلم بها عالم الغيب

ويقول عن الحشمة :

بعض الرجاجيل ما ودك تحشمها ... ولكن ودك تحشم نفسك عنهم

وبعض السوالف يجي رجل ويضخمها...من الناس ودك عن الزلات تفطمهم
وكــــــــان والدي دايم لا انتخى يقول انــــا اخو ادليــل ومعروف بنخوة رحمة اللة
وابناء عشوي الخضير هم: فرج وناصر رحمه اللة ومحمد والحميدي وصباح وفلاح ومياح واللة يجعل فينا البركة امين

هذا ما استطعت جمعه عن ابي رحمه الله وارجو من الاخوه الكرام من يعرف اي قصيده او قصه لوالدي الا يبخل علي بذكرها

ودمتم في رعاية الله وحفظه

اخوكم : فلاح عشوي الخضيرالعنزي