ديوان الشاعر / دحام بن بدر الهذال

حصريا لمضايف قبيلة عنزة

تعوّدت نفسي على عيشة الرغد = واثري حياة العز ماهي بدايمه

ياسرع ماذيك الليالي تغيّرت = والياس بانت في حياتي علايمه

مسّيت حبل الوقت والوقت مسّني = عيّا يداوي من جروحي سقايمه

واصبحت بين أمسي ومابين حاضري = أبكي على الأطلال والروح هايمه

مرّتني الذكرى وهاجت صبابتي = وجدّت علي من المواجع قدايمه

لك آلله ياشوق ( ن ) دعاني وجابني = من أقصى خيال ( ن ) فيه الافكار حايمه

كنّه يصاليني على واهج الغضى = وحامي هجيره تكتويني سمايمه

جزا آلله 00 من خلّت دموعي بهجرها = مثل السحاب اللي تحدّر غمايمه

وجدي عليها 00 واشتياقي بعد لها = شوق السقيم اللي تردّت عزايمه

لابارك الله بالهوى واحسب الهوى = مثل البحر فيه أكثر الناس عايمه

خلّف طعونه في ضميري وخلّدت = سود الليالي مامضى من رسايمه

ذكرى غزال ( ن ) قاد جول ( ن ) من الظبا = ومن قبل أصيبه 00 صوّبتني سهايمه

بعيون خرس ( ن ) ناظرتني وسلهمت = عزّي 00 لمنهو ساهي الرمش ضايمه

تخيّلت فيها انعاس باطباقة الهدب = واثر العيون المسبله 00 غير نايمه

ياعاذلي 00 تدري فؤادي بحبّها = ماطاع شور ولا سمع هرج لايمه

أموت 00 واحيا كل ماحل ذكرها = وانوح لا هب الشمال بنسايمه

لو شفت عذب شفاتها لاتبسّمت = أفطرت 00 لو كل المخاليق صايمه ! !

http://mdyf.net/vb/showthread.php?t=3254

حصريا على شبكة مضايف قبيلة عنزة

يسرني أن أهدي لكم هذه القصيدة .
أتمنى أن ترقى قصيدتي المتواضعه الى مستوى ذائقتكم الأدبيه


حبيت بنت العم واخفيت حبها = أخاف واخشى من كلام ( ن ) يعيبها

فضلّتها على البني واكثر البني = ماتعترف بالعشق ربي حسيبها

بكر المشاعر سافرت بي من أجلها = تقبل وتقفي والمحبّة تجيبها

حبيبتي 00 لو عذّبتني حبيبتي = عسى صواديف الدهر ماتصيبها

لاجيت أحدّثها عن العشق تبتسم = ماخافت الله في مشاعر حبيبها

في وجنتيها 00 يوصف الورد والشذا = لو شم عبق أنفاسها ينتشي بها

عذب اللمى واحلا من الشهد ريقها = يذوب من حر الشفاه ولهيبها

عذروبها 00 مايندرا حين تبتسم = تعكس شروق الشمس والاّ مغيبها ! !

على مواجيب الوفا نحفظ الوفا = ونفوسنا رب الخلايق رقيبها

عشت بحياتي عيشة الظيم والقهر = وايام عمري ماعرفت أهتني بها

شاعر 00 واديب 00 وراس مالي مشاعري = لاني مهمّلها ولا معتني بها

أختار من بين الملا خيرة الملا = واخاطب كبار العقول ولبيبها

أبياتي اللي خلّدتني 00 تخلّدت = واهل المشاعر والشعر تقتدي بها

تجاربي بابيات شعري كتبتها = والكلمة اللي قلتها مقتدي بها

ناس ( ن ) ترد الباب من كثرة الردى = وناس ( ن ) ترد الباب من زود طيبها !

رامت فعول الطيب والعوز حدّها = وقصرت يديها من تردّي نصيبها

راع الكرم ماشاح وجهه عن الكرم = الاّ من عجاف السنين وعصيبها

يقولها من جرب الياس والشقا = واصغر طموحاته عجز يلتقي بها

من عاش بالدنيا مثل عيشتي بها = شابت عيونه قبل موعد مشيبها

ومن لاتعلّم في حياته من الزمن = لايلتحق بالجامعة وش يبيبها ؟

كلن على بلواه يصبر ويحتسب = ورب الملا يجزي العباد ويثيبها

الناس 00 ماتشكي من طعون خصمها = أكثر مواجعها 00 تجي من قريبها !

والعزوة اللي ماهي حزام للظهر = ماينقنص فيها 00 ولاينهقي بها

دحام بن بدر ال هذال

ياسيل . . جاك السيل غطّا على السيل = مابه سوى جلب الكوارث والاهوال

سيل الدموع اللي تهل الهماليل = مثل المطر واكثر من الغيث لاسال

ضاع الهوى . . وش قيمة القال والقيل = جف القصيد ودامي الدمع همّال

وش عاد لو جرّيت عذب المواويل = مافادني نظم القصايد والامثال

همٍ بقلبي لو يوزّع على الجيل = يكفي . . ويبقى به رصيدٍ للاجيال

وهمٍ سقاني كاس ويلٍ بثر ويل = واصبحت بين الناس شاعر ورحّال

وهمٍ يحط بوسط قلبي مداهيل = كنه يسوّي بين الاضلاع زلزال

انا مدينة واسكنتها الغرابيل = ماللفرح فيها معالم ومنزال

كلّه عشان اللي هدبها مضاليل = من حقّها بين الغنادير تختال

تفوقهن في كل وصفٍ وتجميل = وصارن حواليها من يمين وشمال

مثل الكواكب والنجوم المشاعيل = والشمس تسطع بالمهابة والاجلال

عاهدتها . . وانا عن العهد ماميل = عاشق بصدق . . وصادق العشق قتّال

واشعلت في ليل المحبّه قناديل = طموحي اكبر من ضروفي والاشغال

صرت اتمادا وارقب الجدي وسهيل = واثر الفرج دونه مسافات واميال

واليوم . . معها ماتفيد المواصيل = هي عندها عيالٍ . . وانا عندي عيال !

اتعبت عيني ترقب البيت وتخيل = يمكن تشاهد زولها بين الازوال

عن غيرها ماينوي القلب تبديل = وان قيل تنسى حبّها . . قلت من قال ؟

هذي لها بالقلب قدرٍ وتبجيل = واطفالها . . دايم يمرون بالبال

فيهم شبه منها برسم التماثيل = نفس الملامح . . مابها شك وجدال

من لهفتي . . قبّلت الاطفال تقبيل = وشمّيت زاكي عطرها بين الاطفال

بغيت اقول ودمع عيني هماليل = مع امكم يربطني الود بحبال

خلت الليالي والسنين المقابيل = تصفى وهي في كل يومٍ لها حال

ياكبر شرهاتي على الوقت لو قيل = الوقت للي يملك جنيه وريال

مي البحر ماهو مثل ميّة النيل = والناس واجد فيهم اجناس واشكال

البعض منهم ماوراهم محاصيل = ولايستحق انك تسميه رجّال

ياللي على حمل الشقا هدك الشيل = ماينفعك عمٍ ولا ينفعك خال

ترى المواقف والشدايد تبي حيل = ولاكل منهو يركب الخيل خيّال

بصبر عساها بالنهايه تساهيل = وان عاضبت . . يحلّها الف حلاّل

وارجع لها من دون شرحٍ وتفصيل = وامنّي النفس الحزينه بالآمال

على الرجا . . لو يقطعون المواصيل = هي عندها عيالٍ . . وانا عندي عيال

علّمت نفسي . . قبل تشره على الناس = ياكثر . . من فيهم تخيب الهقاوي

العشرة اللي ماتعلّت على ساس = لقيت نفسي في مداها خلاوي

مثل النبيذ . . اللي صبغ لونه الكاس = قالوا عن اللي يشربه شخص غاوي

والصاحب اللي مارفع فعله الراس = مايسّتحق انّه لمثلي يخاوي

ترى الصداقه . . بعض الاحيان تنّداس = لاشفتها جرّت عليك البلاوي ! !

ربع المصالح والندامة والافلاس = ياكثرهم وقت الرخا والفضاوي

لاقربهم ينفع ولا فيه نوماس = ولاهمّهم غير الورق والقهاوي

واللي يقولون البدو عنه قرناس = لولا فعوله . . مايسمّى نداوي

سود الليالي عوّدنّي على الياس = خلنّي أقضي عيشتي بالمناوي

همّي بقلبي ماله حدود وقياس = ( وجرحي عطيب ولالقاله مداوي )

لاني قدرت أخفيه عن بعض الاجناس = ولاني على نشر الخفي منه قاوي

ماينفع الطيب . . باللي مايفيد الطيب = بعض الجمايل . . تخرّب بيت صاحبها

نصيحةٍ قلتها من واقع التجريب = واللي يبيها يسجّلها ويكتبها

حقيقةٍ شفتها من غير شك وريب = تو الليالي تعلّمني تجاربها

الطيب . . ضايع بشخصٍ مايعرف العيب = يقصر عن الزين والهقّوة يخيّبها

ضليل عقلٍ ولا يستاهل التّوجيب = وجمايلي فيه . . ماحسّب عواقبها

والطيب عند الشباب وعند راع الشيب = سلم الحمايل وفعله مايعذربها

حقٍ على من لقى في بيتي التّرحيب = يذكرني بخير لاهبّت هبايبها

خلته . . تحلّا بحسن الخلق والتأديب = والمرجله ماهقيت انّه يجنّبها

صحيح . . ماكل رامي يدرك التّصويب = لو النياشين . . قدّامه تقرّبها ! !

أحيان . . بعض الهقاوي بالرجال اتخيب = حتّى أقرب الناس . . ماتوفي بواجبها !

الذيب . . ماعاد ذاك الّلي يسمّا ذيب = والعين يعلا نظرها فوق حاجبها

والعبد لو كان يدري في علوم الغيب = ترتاح نفسه ولا تكثر متاعبها

ياطول همّي بليل الخوف والترّهيب = والشمس . . قفّت عن عيوني ركايبها

تمر الاحداث عندي مالها ترّتيب = والنار تزداد في جوفي لهايبها

كثر المواجع بقلبي تشكي التّعذيب = ولا عاد ادوّر وانشّد عن سبايبها

أخشى . . من اللوم والتّحسيف والتأنيب = وادرى خواطر بعض ربعي واراقبها

كلّه . . من الطيب باللي مايفيد الطيب = أثر الجمايل . . تخرّب بيت صاحبها ! !


دحام بدر الهذال

جسدها . . توأم اللولو وكفّي راحة البحّار = والاوّل شاف بالثاني مرايه تعكس أوصافه

بياضه زاهيٍ باهي يضاهي لولو المحّار = قليل من البشر يقدر يغوص ويجلب أصدافه

بشاشة خدّها الناعم بروعة نشّوة الازهار = زهت به وردة الجوري وبشّ الدم باطرافه

تخيّلت الندى يهمس لبعضه باعذب الاشعار = على خدّينها يكتب . . ويرسم أجمل أهدافه

ورمش عيونها الساهي يبوح بخافي الاسرار = يعانق رمش من شاهد ملامح خدّها وشافه

شعرها اسود من الليل البهيم وعتمة الاسحار = كسا الكتفين واسترسل وغطّا عالي اردافه

تقضّه . . مثل ماقضّت جروحي بآخر المشوار = على ذكر العذاب اللي تمارس فيني أصنافه


دحام بدر الهذال

ماعدت اطيق بواقعي شد الاعصاب = خليّني ارحل مع نسيم الهبايب

أشتاق لك في غربتي شوق الاحباب = وعند اللقاء 00 قلبي من الشوق ذايب

جيتك وانا في خاطري لوم وعتاب = قلبي يسابق خطوتي غير هايب

لاسال دمعك وانتثر بين الاهداب = كفّي يلامس وجنتك والذوايب

أغراب 00 لو كنّا عن الحاضر أغراب = بالحب نصنع معجزات وعجايب

كن القصيد من الخجل يلبس حجاب = والليل هادي مثل همس الحبايب

اجتزت باقدامي مسافات وهضاب = وبرحلتي شفت العجب والغرايب

وصعدت من همّي على راس مرقاب = رجم ( ن ) يشادي ناطحات السحايب

في صحصح ( ن ) مابه مسرّات واصحاب = جلست أحسّب ماجرى من مصايب

أخذت درس من التجارب والاتعاب = ولي اتّضح ماكان خافي وغايب

ماتحصي انواع الرجاجيل بحساب = ذكرتهم في وصف موجز وصايب

فيهم صدوق 00 وفيهم انسان كذّاب = فيهم عظيم 00 وفيهم انسان خايب

قويّهم مادشّه الخوف وارتاب = قلبه يواجه قاسيات النوايب

وضعيفهم ينهار قدّام الاسباب = ولاتّفه حدث تلقى دموعه سكايب

وايضا لقيت برحلتي بعض الاجناب = أخير من بعض الربع ( والقرايب )

انا الذي قلبي جريح ( ن ) ومنصاب = واقرب قريب ( ن ) شب فيه اللهايب

والجرح لامن جاك من عند ( الاقراب ) = ماينفعك فيه الدوا والطبايب

لايخدعك وضعك وتغريك الالقاب = محدن مخلّد من شباب ( ن ) وشايب

دنياك قبلك ماصفت لاهل الالباب = اللي بحكمتهم تحلّ النشايب

بدايتك 00 مخلوق من طين وتراب = ونهايتك 00 توضع عليك النصايب

قصيدة كتبت منذ عدّة سنوات في مدح الشيخ / متعب محروت الهذال . . شيخ مشايخ قبيلة عنزة . .




عذب القوافي . . ودّها تلزم الصمت = عزّت على اللي في جنابك نظمها

وطوّعتها في مدح شخصك ولزّمت = والحر مثلك لا قراها . . فهمها

لله درّك . . لاضحكت وتبسّمت = مثل السحابه يوم يقبل نسمها

ونيران غيظك لو عليها تكتّمت = مثل الجبال اللي تفجّر حممها

لاهنت ياحر ( ن ) بكبد السما حمت = وعلّيت وكرك فوق شامخ قممها

دام الفخر ( ياشيخ متعب ) وله دمت = والكل منّا طاعتك يلتزمها

عزّيت من شان القبيله وساهمت = ورفعت في كل المحافل علمها

( متعب ) بقدره ماجهلت وتوهّمت = يامر . . وينها . . والقضايا حسمها

شرواه مايخشى هل اللوم والشمت = وعداه لاصار الملاقا هزمها

كلّن يهابك لاهرجت وتكلّمت = ومكانتك . . حتى الدول تحترمها

حيثك على كل المشايخ تقدّمت = والطايله من عادتك تغتنمها

ساسك عريب . . وللزعامه تسلّمت = نسل الشيوخ . . اللي تعلّت قيمها

بافعال طيبك ماقصرت وتندّمت = ويمناك جادت واسرفت في كرمها

عيبك . . على كسب المراجل تحيزمت = ونفسك عن الزلاّت ربي عصمها

أنا اشهد انك ( يابو سطّام ) صممت = لوحة شرف يفخر بها من رسمها

من وين . . ماوجّهت وجهك ويممت = جعل المنايا . . مايصيبك سهمها


دحام بدر الهذال

[FONT="Arial"][SIZE="5"]الاهداء اليكم جميعا . . والى ابنتي رهف
مشّتني الدنيا 00 على حامي الثرى = تحرقني الرمضا والاقدام حافيه

في صحصح ( ن ) مافيه شي ( ن ) من الونس = جعل السحايب ماتسيل بفيافيه

قمت أتلفّت عن شمالي وميمني = لامن عشير 00 ولامن أصحاب وافيه

( ماغير أنا ) 00 بالصمت والياس والشقا = ( مثل الشعر ) 00 وزن ومعاني وقافيه !

وحيد 00 همّلني زماني وهالني = واللي بقلبي ياهل العرف كافيه

( هضاب نجد ) أضيق علي من ( صدر رهف ) = والحظ قصّرواقرب الناس جافيه

والعشره اللي بالزمن ماتوثّقت = أقفت ركايبها ولاهي بلافيه

وابحرت في بحر الهلالي لعلّني = أجبر عزا نفس ( ن ) من الياس هافيه

أخفيت أنا مكنون سدّي عن الملا = وملامحي باحت بما كنت خافيه

صوتي يروح 00 ولا يردّه سوى الصدى = والناس ماتسمع نداي وهتافيه

ضيّعت في دنياي دربي ونيّتي = وعمري مضى من غير لذّة وعافيه

سمل الجروح البارده وسط خافقي = زادت طعون جداد 00 وجروح دافيه

منها 00 عيوني عافت النوم والكرى = تسهر طوال الليل والناس غافيه

جادت بمثل الدم وشفاي تبتسم = واجبرتها ترخص من الدمع صافيه

( كيد الروابع ) لازمتني بجورها = لاوكّدت موتي 00 ولاهي بنافيه

خلّتني أمشي طول عمري على الثرى = تحرقني الرمضا 00 والاقدام حافيه


~& دحـــــــام بن بدر ال هذال&~

تذكّرت من شـدّت رحالـه عـن البلـد=تجيبه لي الذكرى علـى غيـر ميعـادي
عفا الله .. عن نفسٍ لها بالرجـا سنـد=تربّص بها الحرمان في كـل مرصـادي
توجّد على ظبـيٍ كسـر شوكـة الأسـد=يبي يقطع المعـروف مابيـن الاجـوادي
جفل من قبل يـارد علـى المـا ولا ورَد=كما الريم يجفـل لا لمـح زول صيـادي
سبقني كما برقٍ سبـق ضوحـه الرعـد=أخيله.. وقلبـي ينجـذب لـه وينقـادي
وتحدّر مثـل غيـثٍ تحـدّر بـه البَـرَد=وتتابـع بديـمٍ مايجـي فيـه رعّــادي
ربطني بحبلٍ مثـل حبـلٍ مـن المِسَـد=عقَـد بأولـه موتـي وتاليـه ميـلادي
عيوني من اسبابه تقـل تشكـي الرمَـد=جفاها المنـام وحاربـت كـل مرقـادي
تصبّرت واعياني بـه الصبـر والجَلَـد=وسوا بـي طعـونٍ قديمـات واجـدادي
جرى ماجرالي في غرامـه مـن الجَهَـد=يقـدّ الضمايـر قـدّة السيـل للـوادي
إذا هب نسناس الهـوى يثنـي الجسـد=لاجل ماتشق الثوب غضّـات الانهـادي
هَني .. الخليج اليعربي بينهـن سجـد=ليا دغدغه ريحٍ ضحك موجـه الهـادي
ألا ياربيـعٍ مارعـت قـفـره الـبـدد=سِمَك فوقه المبني بـلا طنـب واوتـادي
على ضيق لبسه ضاق صدري من الحَسَد=وغبطت الثياب اللي على بعض الاجسادي
ملاكٍ ولـه قصـرٍ مشيّـد علـى العمـد=تطوف الكواعب به جماعات و افـرادي
تبسّم بوجهي وابتسـم لـي بـه السَعَـد=مثل ماتبسّم فـي لقـاي أصغـر أولادي
وهمس لي بثغـرٍ ذوّب الله بـه الشَهـد=سرى مثل صوت الناي باحساس قصّادي
كثر مايواعدنـي .. ولا يوفـي الوعـد=كثر مايسافربـي .. مـن بـلاد لبـلادي
صغيرٍ ولا له فـي دروب الهـوى عَهَـد=خجولٍ .. جفولٍ .. له مثولٍ مهو عـادي
عليه الحيا ماشفـت لونـه علـى أحَـد=سوى الديدحان اللي على وجنتـه بـادي
عيونه .. عيون اللي كفخ ساعة الهـدد=ونظراته الوجلا .. تقل سيـف جـلاّدي
أبـد مايخالفـنـي ولا نختـلـف أبــد=عدا .. يوم سايرته لزم موقـف حيـادي
وفقدت الصواب وحدت عن مسلك الرشد=ودلّيـت دربٍ مايدلّـه سـوى الغـادي
نويـت أتمـادى واندفـع لآخـر الأمَـد=واظن الهدايه بالهوى .. مثل الالحـادي
وتفلّت مثـل طفـلٍ تفلّـت مـن المَهَـد=ومنه العَرَق صـار يتصبـب ويـزدادي
نزل من على مجرى نهوده يابـو فهـد=مثل ما نزل دجله .. على صدر بغـدادي
دحام بدر الهذال